Na sesión tamén se aprobou con carácter inicial o Plan Especial de Infraestruturas e Dotacións no Medio Rural impulsado pola Fundación Galicia Sustentable.
Na sesión ordinaria da Xunta de Goberno Local celebrada hoxe foron adxudicados cinco proxectos de mellora de infraestruturas de titularidade municipal que conxuntamente superan o medio millón de euros de investimento.
Unha desas actuacións consiste na renovación do céspede sintético do campo de fútbol Municipal da Laracha. Será cambiada a herba artificial no terreo de xogo e os seus espazos circundantes, sumando unha superficie total de 6.951 metros cadrados. O novo céspede cumprirá coas especificacións e normativas correspondentes para asegurar a máxima calidade conforme aos niveis que esixe a certificación FIFA Quality Pro. Colocarase sobre unha nova base plástica que presentará un máis óptimo comportamento deportivo para a práctica do fútbol.
Os outros catro proxectos céntranse na mellora da rede viaria noutras tantas parroquias. A actuación de maior entidade será en Golmar, na estrada que comunica O Igrexario con San Pantaión. O tramo obxecto desta intervención presenta unha lonxitude de 1.225 metros, nos que vai ser renovada a superficie de rodadura dos vehículos con aglomerado asfáltico en quente, acondicionados os sobreanchos a ambas marxes da calzada e perfiladas as cunetas para favorecer a drenaxe do terreo. Os traballos completaranse coa sinalización vertical e horizontal, contemplando o pintado das liñas dos bordes e do eixo da plataforma, así como dos símbolos necesarios segundo o código de circulación.
En Erboedo o proxecto afecta unha lonxitude aproximada dun quilómetro da estrada que comunica A Fontenla co límite con municipio veciño de Arteixo á altura do Loureiro. A actuación inclúe o acondicionamento do sobreancho no tramo máis estreito para ampliar a calzada. Ademais da pavimentación, acometerase a limpeza e perfilado das cunetas para facilitar a drenaxe e a sinalización horizontal e vertical.
En Lemaio mellorarase a vía entre A Fraga e O Pereiro dotándoa cun novo pavimento e incluíndo, tamén, a limpeza das cunetas e a sinalización.
E a actuación en Caión localízase no núcleo do Outeiro, onde vai ser mellorada a calzada ata o entronque coa estrada que dirixe a Baldaio (DP-1909), favorecendo tamén as comunicacións coa zona do santuario dos Milagres.
Noutra orde de asuntos, acordouse concorrer a dúas liñas de axudas da convocatoria da Secretaría Xeral de Igualdade da Xunta de Galicia dirixidas á promoción da igualdade. Unha delas enmárcase no Plan Corresponsables e ten por fin reforzar o servizo municipal de axuda á conciliación que se presta a través do Programa Harmoniza. A outra liña é a referida ao apoio aos Centros de Información á Muller (CIM), solicitándose a cooperación para o financiamento dos gastos do persoal adscrito a dito departamento municipal.
Ademais, o Concello concorre á convocatoria de subvencións da Consellería de Cultura, Educación, Formación Profesional e Universidades para mellorar as coleccións bibliográficas das bibliotecas municipais da Laracha, Paiosaco e Caión e para dotalas con novidades editoriais en galego.
Plan Especial de Infraestruturas e Dotacións no Medio Rural
A Xunta de Goberno Local tamén acordou aprobar con carácter inicial o Plan Especial de Infraestruturas e Dotacións no Medio Rural impulsado en Montemaior pola Fundación Galicia Sustentable. O seu ámbito de aplicación abarca dúas parcelas catastrais de titularidade privada e unha superficie total de 45.038 metros cadrados, tomando como base de partida os terreos que compoñen a Finca Experimental, da propia promotora, emprazada no Igrexario desa parroquia.
O obxecto do Plan Especial é a ordenación detallada do ámbito e a concreción dos seus usos que permitan destinalo á implantación dunha dotación multifuncional dedicada á investigación e innovación para a protección e recuperación de espazos de valor ambiental. Os promotores pretenden facer deste lugar unha referencia para a prosperidade sostible do medio rural.
Nos próximos días o Plan Especial será publicado no Diario Oficial de Galicia (DOG), momento no que se abrirá o período de información pública de dous meses.
